monumenta.ch > Petrus Comestor > 141
Petrus Comestor, Historia scholastica, HISTORIA EVANGELICA., , CAP. CXL. Propria signa adventus Iudicis. <<<     >>> CAP. CXLII. Quod solus Pater novit diem iudicii, et de uno assumpto, et altero relicto.

CAP. CXLI. De signis quindecim dierum ante iudicium.

1  Hieronymus autem in annalibus Hebraeorum invenit signa quindecim dierum ante diem iudicii, sed utrum continui futuri sint dies illi, an interpolatim, non expressit. 2  Prima die eriget se mare quadraginta cubitis super altitudinem montium stans in loco suo quasi murus. 3  Secunda tantum descendet, ut vix posset videri. 4  Tertia marinae belluae apparentes super mare, dabunt rugitus usque ad coelum; quarta ardebit mare, et aquae; quinta herbae et arbores dabunt rorem sanguineum; sexta ruent aedificia; septima petrae ad invicem collidentur; octava fiet generalis terrae motus; nona aequabitur terra; decima exibunt homines de cavernis, et ibunt velut amentes, nec poterunt mutuo loqui; undecima surgent ossa mortuorum, et stabunt super sepulcra; duodecima cadent stellae; tredecima morientur viventes, ut cum mortuis resurgant; quartadecima ardebit coelum, et terra; quintadecima fiet coelum novum, et terra nova, et resurgent omnes. 5  Et addidit Iesus: « Sicut fulgur exit ab oriente et paret usque in occidentem, sic erit adventus Filii hominis (Matth. XXIV; Luc. XVII), » subitus scilicet, et coruscus, et tunc apparebit signum Filii hominis in coelo, id est in aere, supra locum unde ascendit, et ante eum erunt instrumenta mortis suae, quasi vexilla triumphi, crux, clavi, lancea, et in carne eius videbuntur cicatrices, ut videant in quem pupugerunt (Apoc. I), et in valle Iosaphat iudicabitur omnis homo, angelis congregantibus eos (Marc. XIII).